Ijumaa, 01 Novemba 2024 Afrika Kusini

Mhifadhi Bahari kutoka Hifadhi ya Bahari ya Kisiwa cha Mafia (MIMP),  Bw. Ailars David ameshirki katika Kongamano la 7 la Kimataifa la Uhifadhi wa Baharini (IMCC7) liliofanyika kuanzia Octoba 13-18 katika mji wa Cape Town nchini Afrika Kusini.

Kongamano la Kimataifa la Uhifadhi wa Baharini (IMCC) lenye kauli mbiu “Kufanya Sayansi ya Bahari kuwa Muhimu” ni Mkutano unaofanyika kila baada ya miaka 2 ambapo huwakutanisha wanasayansi wasomi, watetezi wa mazingira, waelimishaji, watendaji, maafisa wa serikali, wawakilishi kutoka tasnia, wasanii na raia wanaohusika na mambo ya bahari. 

Mkutano huu ni mkubwa zaidi wa taaluma mbalimbali za uhifadhi wa bahari duniani wenye lengo la kuleta pamoja vikundi vingi vya washikadau ambao hutawapata kwenye mikutano ya kawaida ya kitaaluma.

Akihutubia katika kongamano hilo, Ailars alieleza kuwa uwezeshaji wa vijana katika kubuni na kusimamia maeneo ya uhifadhi ya baharini (MPA) unaweza kuimarisha usimamizi wa Maeneo yaliyohifadhiwa (MPAs). mafunzo muhimu kwa ajili ya siku zijazo za MPA za Tanzania na juhudi za uhifadhi wa baharini.

Pia, Alisisitiza umuhimu wa jamii kushiriki katika mikakati ya uhifadhi ili kuhakikisha matumizi endelevu ya rasilimali za baharini kwani njia hii inaweza kuimarisha usimamizi wa MPA.Msisitizo wake juu ya kutumia ubunifu unaoendeshwa na vijana na kutumia zana kama akili bandia na GIS kwa ajili ya kufuatilia mabadiliko ya pwani una uwezo mkubwa wa kuimarisha juhudi za uhifadhi za Tanzania.

Akihitimisha hotuba yake, Ailars alisisitiza umuhimu wa suluhisho yanayotokana na jamii, ambayo yanaweza kutumika kwa MPA za Tanzania ili kuimarisha ulinzi wa bioanuwai, maisha endelevu, na ustahimilivu dhidi ya mabadiliko ya tabianchi. 

Aidha, hotuba yake ilibeba dhima kuu ya kuwashirikisha wadau wote, hasa vijana, katika usimamizi wa rasilimali za bahari ili kulinda siku zijazo za mfumo wa ikolojia tajiri nchini Tanzania.